విధేయత – విశ్వాసం యొక్క ఫలితం

 విధేయతను గురించి ఆదికాండము 17:22–27 నుండి కొన్ని ప్రాముఖ్యమైన అంశాలు: 

1. నిజమైన విశ్వాసం విధేయతగా ఫలిస్తుంది. అబ్రహాము దేవుని ఆజ్ఞను విన్నాడు, అంగీకరించాడు, వెంటనే ఆచరణలో పెట్టాడు. విశ్వాసం కేవలం మాటల్లోనే కాదు, మన క్రియల్లో కూడా కనిపించాలి. Faith alone saves, but the faith that saves is never alone.

2. విధేయతలో ఆలస్యం చేయకూడదు. దేవుడు అబ్రహాముకు సున్నతి చేయమని ఆజ్ఞాపించినప్పుడు, అతడు తనకు అనుకూలమైన సమయం కోసం ఎదురుచూడలేదు. అదే దినమున తనకు, ఇష్మాయేలుకు, తన ఇంటివారందరికీ సున్నతి చేయించాడు. కీర్తన 119:60లో దావీదు ఇలా అంటున్నాడు: “నీ ఆజ్ఞలను అనుసరించుటకు నేను జాగుచేయక త్వరపడితిని.” దేవుని చిత్తం మనకు స్పష్టంగా తెలిసినప్పుడు, “తర్వాత చూద్దాం” అని వాయిదా వేయకూడదు.

3. విధేయత మన ప్రభువైన క్రీస్తు పట్ల ప్రేమకు నిదర్శనం. యోహాను 14:15లో యేసు, “మీరు నన్ను ప్రేమించిన యెడల నా ఆజ్ఞలను గైకొందురు” అని చెప్పాడు. మనం క్రీస్తును ప్రేమిస్తున్నామని చెప్పడం మాత్రమే కాదు, ఆయన వాక్యానికి లోబడటం ద్వారా ఆ ప్రేమను చూపించాలి.

4. మన పాపాన్ని చూపించినప్పుడు వెంటనే పశ్చాత్తాపపడాలి. దేవుని వాక్యం ద్వారా లేదా సంఘ సభ్యుల ద్వారా మన తప్పులు బయలుపరచబడినప్పుడు, వాటిని సమర్థించుకోవడం, ఇతరులపై నింద వేయడం కాకుండా, వినయంతో అంగీకరించి పశ్చాత్తాపపడాలి.

5. సంబంధాలలో సమాధానపడటానికి మనమే ముందడుగు వేయాలి. ఇతరులతో విభేదాలు వచ్చినప్పుడు, ఎదుటివారే మొదట రావాలని ఎదురుచూడకుండా, సాధ్యమైనంత త్వరగా మనమే ముందడుగు వేయాలి. యేసు మత్తయి 5:23–24లో బోధించినట్లు, ఇతరులతో సమాధానపడటానికి ప్రాధాన్యత ఇవ్వాలి.

6. క్షమాపణ చెప్పవలసినప్పుడు గర్వంతో ఆలస్యం చేయకూడదు. మన మాటల వల్ల లేదా ప్రవర్తన వల్ల ఎవరైనా బాధపడితే, మన గర్వాన్ని పక్కనపెట్టి, తప్పును అంగీకరించి, క్షమాపణ అడగాలి. నిజమైన విధేయత మన అహంకారాన్ని సమర్థించుకోదు;దానిని దేవుని ముందు అణచుకుంటుంది.

7. సంఘ సభ్యుల అవసరాలను చూసినప్పుడు వెంటనే స్పందించాలి. “ఇంకెవరైనా సహాయం చేస్తారులే” అని అనుకోకుండా, మన వల్ల సాధ్యమైతే అవసరంలో ఉన్నవారికి సహాయం చేయడానికి ముందుకు రావాలి. దేవుని పట్ల మన విధేయత, సంఘ సభ్యుల పట్ల మన ప్రేమలో కూడా కనిపించాలి.

8. క్రీస్తు చేసిన కార్యాన్ని గుర్తించి, ఆయనకు విధేయులుగా జీవించాలి. పాత నిబంధనలో అబ్రహాము శారీరక సున్నతి ద్వారా దేవుని నిబంధనకు విధేయత చూపించాడు. అయితే నూతన నిబంధన విశ్వాసులమైన మనకు శారీరక సున్నతి అవసరం లేదు. క్రీస్తు తన రక్తాన్ని చిందించి మనల్ని విమోచించాడు; పరిశుద్ధాత్మ ద్వారా మన హృదయాలను మార్చి, మనం పాపానికి చనిపోయి దేవునికి జీవించేలా చేస్తున్నాడు (కొలస్సీ 2:11–13). కాబట్టి మన విధేయత రక్షణ పొందడానికి చేసే ప్రయత్నం కాదు; క్రీస్తులో ఇప్పటికే పొందిన రక్షణకు కృతజ్ఞతతో చూపించే ప్రతిస్పందన.

విధేయత అనేది దేవుని ప్రేమను సంపాదించుకునే మార్గం కాదు; క్రీస్తు ద్వారా మనకు అనుగ్రహించబడిన దేవుని ప్రేమకు మనం చూపించే విశ్వాసపూర్వక ప్రతిస్పందన.

- డా.శంకర్ బాబు