సంఘములో కులవ్యవస్థ

 

కుల వ్యవస్థ ఆరంభం

హిందూ పురాణాలలో మరియి ఇతర లేఖనాలలో, పురుష్ అనే వ్యక్తి శరీర భాగాల నుండి మనుష్యులు సృష్టించబడినారు అని వ్రాయబడింది.

తల నుండి బ్రాహ్మణులు, ఉదరం మరియి భుజాల నుండి క్షత్రియులు, తొడ భాగం నుండి వైశ్యులు, కాలి  పాదము నుండి శూద్రులు సృజియించబడినారు.

బ్రాహ్మణులు శిరస్సు నుండి వచ్చినవారు కావున జ్ఞానవంతులు మరియు పాండిత్యములో ప్రావీణ్యులు.

భుజాల నుండి ఉద్భవించిన క్షత్రియులు పోరాటయోధులు మరియు బలాఢ్యులు.

వైశ్యులు వ్యాపారములో విశిష్ఠులు.

ఇక మిగిలింది శూద్రులు. వీళ్ళు కాలి పాదము నుండి వచ్చినవారై పైన గల మూడు జాతుల వారికి సేవ చేయడం వీరి పని.
వీరి తర్వాత అంటరానివారు అనగా పంచములు అని పిలవబడే వారు సమాజంలో నీచమైన పనులనబడే చెత్త తీయడం,శవాలను పూడ్చడం, మలమూత్ర విసర్జకాలు కడగడం చేస్తారు. వీరిని దళితులు మరియు వెనకబడిన జాతులు అని పిలుస్తుంటారు.
వీరిని కుక్కలకన్నా హీనంగా ఆ దినాల్లో చూసేవారు.

ఈ విధమైన కుల వ్యవస్థ భారతదేశంలో వేల సంII ల క్రితం మొదలయ్యింది. బ్రాహ్మణులు మాత్రమే అధిక జ్ఞానముకై అర్హులు అనియు  శూద్రులు చదవడం, వ్రాయడం చేయక కేవలం మిగతా జాతుల వారికి సేవకులుగా పని చేయుటకు జన్మించారని నమ్మేవారు.

ఈ వ్యవస్థ దాదాపు క్రీస్తు పూర్వం 1500వ సంII లో ఆర్యులు భారత దేశానికి  వచ్చినప్పుడు వారి హయాంలో ఉద్భవించినట్లుగా చరిత్రకారుల అంచనా.

ఈ కుల వ్యవస్థ యొక్క సిద్ధాంతమును ఈ విధంగా వివరించవచ్చు.

మనిషి ఒక వ్యక్తి యొక్క శరీర భాగాల నుండి వాని వాని జాతిలో మాత్రమే జన్మిస్తాడు.

పుట్టుకతోనే మనిషి కులమును కలిగి చచ్చి పోయేంత వరకు అదే కులములో కొనసాగుతాడు.

మనిషి కులమును బట్టి వాని కుల వృత్తిలో పనిచేస్తాడు.

ఆనాటి నుండి నేటి హైటెక్ యుగం వరకు ప్రతి పల్లెలో పట్టణంలో ఈ కులం మనుష్యులను వేరు చేస్తూనే ఉంది.

గ్రామాల్లో కుల ప్రాతిపదికన గృహాలుంటాయి. ఒక కులం వారు వేరే కులం వారితో కలవరు. దళితుల గృహాలు ఊరి చివర ఉంటాయి.

తక్కవ కులం వారు ఎక్కువ కులం వారితో వివాహ సంబంధాలు పెట్టుకోరు. ఒకవేళ పిల్లలు ప్రేమ వివాహం చేసుకుంటే వారిని హత్య చేయడానికి కూడా వెనుకాడరు.

ఇది కేవలం ఇళ్లలో మాత్రమే కాక సమాజంలో కూడా విస్తరించి ఉంది. కులాల పేరిట సంఘాలు, రాజకీయాలు, పదవులు ఇలా అంతటా ఈ  కుల వ్యవస్థ నాటుకుపోయి భారతదేశ అభివృద్ధికి ప్రధాన అడ్డంకిగా మారింది,

బైబిలు బోధ

అది 1:26,27 - దేవుడు మన స్వరూపమందు మన పోలికె చొప్పున నరులను చేయుదము.... దేవుడు తన స్వరూపమందు నరుని సృజించెను.

నిత్యత్వములో ఉనికి గల ఆది సంభూతుడు, అధిక జ్ఞానవంతుడు, మహోన్నతుడు, సృస్ష్టికర్తయైన దేవుడు మనుష్యులను తన రూపములో అనగా తన లక్షణాలను ప్రతిబింబించే వ్యక్తులుగా సృష్టించినాడు.

మనిషి మట్టినుండి నిర్మించబడి దేవునిచే జీవవాయువును పొందుకొని  జీవించు ఆత్మగా చేయబడినాడు.

ఆ మొదటి మానవుని నుండి ఈ లోకంలోకి మానవ జాతి విస్తరించబడింది.

దేవునికి కుల,మత,జాతి, వర్గ, విబేధాలు లేవు. వీటికి వేరుగా దేవుడు మనిషిని సృస్ష్టించినాడు.

గలతీ 3:26-28 ప్రకారం,  గ్రీసు దేశస్థుడని లేదు, దాసుడని స్వతంత్రుడని లేదు, పురుషుడని స్త్రీ అని లేదు, యేసు క్రీస్తునందు మీరందరును ఏకముగా యున్నారు.

ఏ ప్రాంతంలో పుట్టినా, ఏ భాష మాట్లాడినా, ఏ పని చేస్తున్నా మనుష్యులు దేవునిచే ఆయన రూపులో  చేయబడినవారు అని తెలుసుకోవాలి.

ఆయన అందరికి దేవుడు (అపోస్త 10:34,35). ఒక ప్రత్యేక కులానికో, మతానికో కాదు.

యేసుక్రీస్తు ప్రభువు మనలను ప్రేమించి, సిలువలో మరణించినాడు. ఆయన మరణం, ప్రేమకు చిహ్నం. పాపముతో నశించిపోతున్న వారికై ఆయన తనువు చాలించాడు. అందరమూ పాపులమే కదా. ఇక్కడ కులం జాతి రంగు ప్రాంతం అనే తేడా లేనేలేదు.
ప్రేమ ఐక్యతను కోరుతుంది. నిజమైన ప్రేమలో బేధాలు ఉండవు.
దేవునికి లేని బేధాలు మనకెందుకు ?

ఆ దినాల్లో యూదులు కూడా అన్యజనులను అంటరానివారిగా చిన్నచూపు చూసేవారు. ఈ ఇరువర్గాల మధ్య అడ్డుగోడ ఉండేది.

అయితే యేసు క్రీస్తు ప్రభువు తన సిలువ మరణము ద్వారా ఆ అడ్డుగోడను పడగొట్టి వారిని ఏకముగా చేసినాడని వాక్యం సెలవిస్తోంది (ఎఫెసీ 2:13,14).

దేవుడు మనుష్యుల మధ్య గల బేధాలను తొలగించాడు. శత్రువులుగా ఉన్నవారిని తన సువార్త ద్వారా మిత్రులుగా చేసి తన శరీరమైన సంఘములో స్థానమిచ్చాడు. సంఘము ఆయన కుటుంబము. కుటుంబములో కుల పట్టింపులు పాపము.

నేటి సంఘ దుస్థితి

హిందూ వ్యవస్థలో పురుడుపోసుకున్న ఈ కులగజ్జి క్రీస్తు సంఘమును కూడా మలినం చేస్తుంది. దీనికి కారణం క్రైస్తవ సోదర, సోదరీమణులే అని చెప్పక తప్పడంలేదు.

యేసు క్రీస్తుని విశ్వసించినవారు, యేసుక్రీస్తు శరీరములో ఒక్కటిగా యున్నారు (1కొరింథీ 12:27) అని చెప్పిన వాక్యమునకు విరుద్ధముగా సంఘములో కుల ప్రతిపాదికన విబేధాలు తీసుకొస్తున్నారు.

నేడు చాలా ప్రదేశాలలో కులాల పేరుమీద స్థానిక సంఘాలున్నాయి. ఎక్కువ కులం వారికో సంఘం, తక్కువ కులం వారికో సంఘం. వీరు,వారు కలవరు.  ఇద్దరూ ఆరాధిస్తుంది మాత్రం కులపట్టింపు లేని క్రీస్తునే.

ముఖ్యముగా హిందూ కుటుంబం నుండి ప్రభువును నమ్మిన వారు, సంఘమునకు వస్తూ వస్తూ తమతో కులాన్ని కూడా వెంటపెట్టుకొని రావడం, సంఘములో కూడా కులం అనే పునాది మీద సంబంధాలు కట్టుకోవడం చేస్తున్నారు.

ఒకే సంఘములో ఉండి కూడా, తక్కువ కులంనుండి ప్రభువుని విశ్వసించిన వారిని చిన్నచూపు చూస్తూ, వారితో ఎక్కువగా కలవక, మాట్లాడక క్రీస్తు ఐక్యతకు భంగం వాటిల్లిస్తున్నారు.

పక్షపాతం లేని దేవున్ని ఆరాధిస్తూ, కుల పక్షపాతం కలిగుండడం పాపమే.

వివాహ సందర్భంలో ఈ కుల పిచ్చి మరీ ముదిరిపోయింది. రక్షించబడడం, దేవుని ప్రేమించడం వాక్యమునకు విధేయత అనే సంగతులను పక్కన బెట్టి, కులమే పునాదిగా క్రైస్తవ వివాహాలు జరగడం బహు బాధాకరం.

తల్లిదండ్రుల ఒత్తిడితో కొంతమంది యవ్వనస్తులు కూడా వారి కులంలో నుండి ప్రభువును నమ్మినవారిని పెళ్లి చేసుకుంటున్నారు.

మరీ విచారకరమైన విషయమేమిటంటే, కులం చూడొద్దు,ఇది వాక్య విరుద్ధం అని చెప్పాల్సిన పాస్టర్లే దగ్గరుండి ఈ వివాహాలు జరిపిస్తున్నారు.

లోకానికి వెలుగుగా ఉండుటకు పిలవబడ్డవారే, ఈ అంధకారసంబంధ క్రియల్లో పాల్గొనడం సరియైనది కాదు.

యాకోబు2:9 ప్రకారం, పక్షపాతం చూపడం పాపమే. మనిషి యొక్క డబ్బును, హోదాను, కులమును బట్టి గౌరవించడం, తక్కువ డబ్బు,పేదరికం, తక్కువ కులమును బట్టి ఛీత్కరించుకోవడం పాపమే.

లోక సంప్రదాయమును సంఘములోకి జొప్పించి సంఘమును కలుషితం చేస్తున్న ఓ సోదర,సోదరీమణులారా ఇకనైనా ఈ కుల గజ్జిని కడుక్కోండి.

క్రైస్తవ బాధ్యత

కులపట్టింపు అనే పాపమును ప్రభువు యొద్ద ఒప్పుకొని పశ్చాత్తాపహృదయంతో ప్రార్థన చేయండి .

ప్రతిఒక్కరూ దేవుని రూపములో చేయబడినవారేయని అందరిని గౌరవించండి.

కుటుంబములో, సంఘములో కులవ్యవస్థకు వ్యతిరేకముగా నిలబడండి.

వివాహ విషయములో సత్యానికి సాక్షిగా, కులానికి విరోధముగా నిర్ణయం తీసుకోండి.

పాస్టర్లు ఈ కులగజ్జికి వ్యతిరేకంగా ప్రసంగించి, సంఘమును దీనినుండి కాపాడండి.