నూతన విశ్వాసులు కాపరిగా పరిచర్య చేయవచ్చా?

నేటి దినాలలో కొంతమంది ప్రభువును
కొత్తగా విశ్వసించి, ఆ పిదప తమకు తాము
సంఘకాపరులుగా ప్రకటించుకుంటూ
స్థానిక సంఘాలను మొదలుపెడుతున్నారు.

పరిచర్య చేయాలనే మంచి ఆశతోనే వారు

సంఘాలను స్థాపిస్తున్నను, దేవుని వాక్యము

కొత్తగా ప్రభువును నమ్ముకున్న వ్యక్తి

సంఘ కాపరిగా ఉండడానికి

ఒప్పుకుంటుందా లేదా చూసే ప్రయత్నం చేద్దాం.

అపొస్తలుడైన పౌలు తిమోతికి వ్రాసిన
మొదటి పత్రిక మూడవ అధ్యాయం
1-7 వచనాలలో సంఘ కాపరికి
ఉండాల్సిన లక్షణాలను విశదీకరించాడు.

6వ వచనంలో "అతడు క్రొత్తగా చేరినవాడై
యుండకూడదు "అని పౌలు చెబుతున్నాడు.

అనగా, యేసు ప్రభువును కొత్తగా అంగీకరించి
మరియు స్థానిక సంఘమునకు కొత్తగా
అంటుకట్టబడిన వ్యక్తి సంఘకాపరిగా
ఉండడానికి వాక్యం అనుమతించట్లేదు

అని మనం అర్థం చేసుకోవాలి.

ఎందుకు పౌలు ఈ విధమైన నియమం
విధించాడు ?  

కొన్ని సంగతులు ఇక్కడ విశదీకరించే ప్రయత్నం చేస్తాను .

1.కొత్తగా ప్రభువును విశ్వసించిన వ్యక్తికి

లోతైన వాక్యపు సత్యములు తెలియదు.
అవి తెలుసుకోడానికి చాలా సమయం
పడుతుంది.

సంఘముకు వాక్యమును బోధించవలసిన
బాధ్యత గల కాపరి, ముందుగా
దేవుని వాక్యంనుండి నేర్చుకోవాల్సిన

వాడైయున్నాడు.

పాఠశాలలో బోధించే ఉపాధ్యాయుడు
ఎంతో చదివి, పరీక్షలు వ్రాసి
తన సబ్జెక్టును విద్యార్థులకు బోధిస్తాడో,

అదే విధంగా దేవుని వాక్యమనే సబ్జెక్టును
సంఘమునకు బోధించుటకు ముందు
కాపరి ఎంతో చదవాల్సినవాడై యున్నాడు.

2.బోధ చేయడానికి ముందు, ఆ వ్యక్తి
1-7 వచనాలలో చెప్పబడిన
దైవిక లక్షణాలు కలిగియుండడం
చాలా ప్రాముఖ్యం.

ఎందుకనగా నాయకుని బోధ కన్నా
తన మాదిరికరమైన జీవితం

శక్తివంతమైన ప్రభావం చూపిస్తుంది.

ఈ లక్షణాలు కొత్త వ్యక్తిలో గమనించి
పరీక్షించడానికి కొన్ని రోజులు లేదా
నెలలు పట్టే అవకాశమున్నది.

ఇక్కడ ఒక ప్రశ్న. ఎవరు పరీక్షిస్తారు?  

సంఘమే పరీక్షించాలి.
అనగా ఒక వ్యక్తి కాపరిగా పరిచర్య చేయాలంటే,
ఆ వ్యక్తిని స్థానిక సంఘమే పరీక్షించి
ఎన్నుకొని ఆమోదించాలని అర్థం.

అనగా తమంతట తామే కాపరిగా
ప్రకటించుకొని సంఘమును
మొదలుపెట్టుట ఆరోగ్యకరమైనది

కాదని తెలుసుకోగలం.

3. కొత్త వ్యక్తికి కాపరిగా అధికారమిస్తే ఆ వ్యక్తి
గర్వాంధుడై, సాతానుకు లోబడి
పాపం చేసే అవకాశమున్నదని (వ6)

పౌలు చెబుతున్నాడు.

ప్రతి విశ్వాసి పాపము చేయుటకు
అవకాశమున్నను

పరిణితి చెందిన వ్యక్తి, తనకు ఎదురయ్యే
శోధనలు దేవుని జ్ఞానముతో  ఎదుర్కొంటు,

సంఘమునకు మాదిరిగా నిలబడతాడు.

4. సంఘమును కాయడం అనగా తండ్రివలె
దేవుని కుటుంబమును దేవునిలో పెంచి
పోషించే కార్యం.

వారి తప్పులు సరిచేస్తూ, స్వంత జ్ఞానంతో కాక

దేవుని నియమాలను అనుసరిస్తూ
కౌన్సిలింగ్ చేయడం, వారి ఆత్మీయ స్థితిని
అర్థం చేసుకుంటూ ఆత్మీయంగా
ప్రోత్సహించడం అనే పనులు

పరిణితి చెందిన వారికే కాని,
కొత్త వ్యక్తికి సాధ్యం కాదు.

ఎందుకంటే కొత్త వ్యక్తికి సంఘ సభ్యుల

ఆత్మీయ స్థితిని గూర్చిన అవగాహన
సంపూర్ణముగా ఉండదు కాబట్టి.

5.సంఘ కాపరులను సాతానుడు ఎక్కువగా
శోధించుటకు ప్రయత్నిస్తుంటాడు.

నాయకుడు పడిపోతే సంఘము కూడా

చెదిరిపోవుటకు ఆస్కారం ఉంటుంది కావున

కాపరులను ఇబ్బంది పెట్టుటకు సాతాను
ప్రయత్నిస్తుంటాడు.

కొత్త విశ్వాసి, వాడి కుతంత్రములు
తెలుసుకొలేక పడిపోయే పరిస్థితి
కలగవచ్చు.

క్రీస్తులో ఎదిగిన విశ్వాసి వాక్యపు శక్తి, ప్రార్ధన,

దేవుని జ్ఞానము, అనుభవం కలిగినవాడై
వాడిని ఎదుర్కొనుటకు సిద్ధముగా
ఉంటాడు.

దేవుని యందు విశ్వాసం, సంఘ సహవాసం,
వాక్య జ్ఞానం, ప్రార్థనా జీవితం ఇవన్నీ
కొనసాగిస్తూ స్థానిక సంఘములో

నమ్మకమైన పరిచర్య చేయుట
ప్రతి నూతన విశ్వాసి యొక్క

కర్తవ్యమైయున్నది.

దేవుడు తగిన సమయంలో ఆయనకిష్టమైన
రీతిలో సంఘము ద్వారా కాపరిగా
నియమించువరకు మనకు
అప్పగింపబడిన పనిని చేస్తూ కొనసాగుదాం.