కుటుంబ సమస్యలు - వాక్యానుసారమైన పరిష్కారం

వివాహం అనే బంధంలో ఇద్దరూ భిన్న వ్యక్తులు భిన్న వ్యక్తిత్వాలతో ఒకటవుతారు.

వివాహం అయింది మొదలుకొని సమస్యలు,  కొన్నిసార్లు ఘర్షణల గుండా కూడా కొన్ని క్రైస్తవ కుటుంబాలు వెళుతూ ఉంటాయి.

సమస్యలు లేని కుటుంబం ఎక్కడా ఉండదేమో!

ఒక విధంగా వివాహం,ఇద్దరు వ్యక్తులలోని వ్యక్తిగత సమస్య అయిన పాపమును చూపించే 

ఒక సాధనమై యున్నది.

సంఘములో ఇతరుల ఎదుట మంచిగా ఉండటానికి ప్రయత్నిస్తారు కాని, 

ఇంట్లో మన కుటుంబ సభ్యుల దగ్గర మన అంతరంగంలో గల పాప స్వభావాన్ని

చాలా మట్టుకు ప్రదర్శిస్తాము.

యేసు క్రీస్తు రెండవ రాకడ వరకు పాపం యొక్క ప్రభావము నుండి 

పూర్తిగా విడుదల పొందలేము కావున, కుటుంబ వ్యవస్థలో కూడా

పాప స్వభావపు ఫలితాలైన సమస్యలు కలహాలు
ఘర్షణలు మొదలైన వాటి నుండి సంపూర్ణమైన విడుదల పొందలేము.

అయితే క్రైస్తవులు ఈ సమస్యల నుండి పరిష్కారం పొందుకోలేని వారు కారు.

దేవుని వాక్యం లో గల ఆజ్ఞల నుండి నియమాల నుండి కుటుంబ సమస్యలకు 

జవాబులు పొందుకొని, దేవునికి ఇష్టమైన కుటుంబాలుగా ఎదగడానికి

దేవుడు సహాయం చేయడానికి ఇష్టపడుతున్నాడు.

చాలామంది క్రైస్తవులు దేవుని వాక్యం యొద్దకు వచ్చి
సమస్యలను పరిష్కరించుకోవడం నిర్లక్ష్యం చేసి,  లోకానుసారమైన నియమాలు,

సలహాల మీద ఆధారపడి కుటుంబాలను విచ్ఛిన్నం చేసుకోవడం చూస్తున్నాం.

లోకానికి ఉప్పు గా వెలుగుగా ఉండాల్సిన క్రైస్తవులు,

కుటుంబ వ్యవస్థకు మాదిరిగా ఉండాల్సిన క్రైస్తవ కుటుంబాలు దేవుని నామమునకు
చెడ్డ పేరు తెచ్చే వారిగా ప్రవర్తించడం బహు బాధాకరమైన సంగతి.

క్రైస్తవ కుటుంబంలో భార్య భర్తల మధ్య సమస్య వచ్చినప్పుడు దానిని
పరిష్కరించుకోవడానికి దేవుని వాక్యాసారమైన కొన్ని నియమాలను

ఇప్పుడుచర్చించే ప్రయత్నం చేద్దాం.

1. సమస్య గురించి పరిష్కరించుకోవడానికి సరైన సమయం నిర్ణయించుకుని
ప్రార్థన పూర్వకంగా మాట్లాడుకోవడం.

2. నీ భాగస్వామి చెప్పే విషయం శ్రద్ధగా ఎటువంటి విచిత్ర ముఖకవళికలు చూపకుండా 

వినడం.
తను చెప్పిన విషయాలు, నువ్వు అర్థం చేసుకున్న విషయాలు ఒకటేనా అని కూలంకషంగా చర్చించుకోవాలి.

3. చెప్పాలనుకున్న విషయాన్ని అరవకుండా నెమ్మదిగా చెప్పడం చాలా మంచిది.

కోపం సమస్యను తీవ్రతరం చేస్తుంది కావున స్వరం మృదువుగా ఉండుట మేలుకరం.

మృదువైన మాట కోపమును చల్లార్చును (సామెతలు 15:1)

4. ప్రస్తుత సమస్య గురించి మాట్లాడుతున్నప్పుడు ఎప్పుడో జరిగిన పాత విషయాలను, 

ఆనాడు పరిష్కరించుకున్న వాటిని తిరిగి తీసుకుని రావద్దు.

5. ఒకవేళ తప్పు నీది అయితే దాన్ని కప్పిపుచ్చుకునే ప్రయత్నం చేయక ఒప్పుకోవడం 

మంచిది. నీ తగ్గింపు, సమస్యను జటిలం చేయకుండా ఆపివేసే సాధనమైయున్నది.

అతిక్రమములను దాచిపెట్టువాడు వర్ధిల్లడు,వాటిని ఒప్పుకొని విడిచిపెట్టువాడు

కనికరము పొందును. (సామెతలు 28:13)

6.వాదనలో గెలవాలనే తత్వం కాదుగాని, నీ భార్యను లేదా భర్తను సంపాదించుకోవాలనే 

తత్వంతో మెట్టు దిగడానికి సిద్ధమై ఉండాలి.

7. దేవుడు మన పాపములను క్షమించినట్లుగా మనము మన భాగస్వామి యొక్క
తప్పులను క్షమించడానికి ముందుకు రావాలి.

ఎవడైనను తనకు హానిచేసెనని యొకడనుకొనిన యెడల ఒకనినొకడు సహించుచు

ఒకనినొకడు క్షమించుడి, ప్రభువు (క్రీస్తు)మిమ్మును క్షమించినలాగున

మీరును క్షమించుడి (కొలొస్సయులకు 3:13).

8. సమస్య మీరు పరిష్కరించుకోలేకపోతే మీ స్థానిక సంఘ కాపరికి తెలియజేయండి

లేదా ఆత్మీయంగా పరిణితి చెందిన సంఘ సభ్యుల సలహాలు కౌన్సిలింగ్ తీసుకోవడానికి
వెనుకాడకూడదు.

ఆలోచన చెప్పువారు లేని చోట ఉద్దేశములు వ్యర్థ మగును, 

ఆలోచన చెప్పువారు బహుమంది యున్నయెడల ఉద్దేశములు దృఢపడును.

(సామెతలు15:22)

9. మీ కుటుంబ సమస్యలను గురించి ఇతరులతో చర్చించే ప్రయత్నం 

చాలా ప్రమాదకరమైనది.

10. సమస్య ఎంత తీవ్రమైన సరే "విడాకులు" అనే మాట రానీయవద్దు.

మరియు వ్యభిచారము నిమిత్తమే తప్ప తన భార్యను విడనాడి మరియొకతెను 

పెండ్లిచేసికొనువాడు వ్యభిచారము చేయుచున్నాడనియు,

విడనాడబడినదానిని పెండ్లిచేసికొనువాడు వ్యభిచారము చేయుచున్నాడనియు

మీతో చెప్పుచున్నానని వారితోననెను. (మత్తయి 19:9)

11.సమస్యను గూర్చి చర్చించిన నిమిషం నుండే మార్పు సాధ్యం కాదు కావున,

వాక్యానుసారమైన ఓపిక కలిగియుండండి.

ప్రేమ దీర్ఘకాలము సహించును, దయ చూపించును (1కొరింథీ 13:4).

12. ప్రాముఖ్యముగా,  నీ భర్త గూర్చి,  నీ భార్య గూర్చి ప్రార్ధన చేయడం మరిచిపోకండి.

హృదయాలను మార్చగలవాడు ఆయనే.

పైన చెప్పబడిన విషయాలు కుటుంబంలో జరిగే ప్రతి సమస్యకు 

పరిష్కారం చూపిస్తాయని నేను చెప్పట్లేదు కానీ, కొంత వరకు ఇవి పాటించడం ద్వారా 

మన సమస్యలను పరిష్కరించుకోవడానికి అవకాశం ఉంటుంది.

ఒక మాట గుర్తు పెట్టుకుందాం.

క్రైస్తవ కుటుంబం సమస్యలు లేని సంపూర్ణమైన కుటుంబం కాదు.

యేసు క్రీస్తు ప్రభువు ద్వారా సమస్యలను పరిష్కరించుకొని, తగ్గింపు కలిగి
సమాధానముతో దేవుని మహిమార్థమై జీవించుటకు ప్రయత్నించే కుటుంబం.

అటువంటి కుటుంబాలుగా ప్రభువు సహాయంతో కట్టుకొని ఆయన నామమునకు
మహిమ తెచ్చుదుము గాక !